Зам, тээврийн салбар хөгжлийн бэрхшээлтэй иргэдэд хандсан үйлчилгээ нэвтрүүлэхэд анхаарна
Зам, тээврийн хөгжлийн яамны удирдлагууд өнөөдөр ээлжит шуурхай хуралдаанаа хийж, салбарын хэмжээнд тулгамдаж буй, шийдвэрлэх шаардлагатай хэд хэдэн асуудлын талаар зөвлөлдөж, холбогдох газрууд тодорхой үүрэг чиглэл авлаа.
Зам, тээврийн хөгжлийн сайд Д.Ганбат шуурхай хуралдааны үеэр УБТЗ ХНН-ээс 2030 он хүртэл хөгжүүлэх хөтөлбөрийн дагуу форум, үйл ажиллагаа зохион байгуулж, томоохон зорилт дэвшүүлэн ажиллаж байгааг сайшаав. Тиймээс бусад харьяа байгууллагууд энэ мэт үйл ажиллагааг зохион байгуулалттайгаар мөрдөн хэвшүүлэх хэрэгтэйг онцлов.
Баруун талдаа хүрдтэй автомашины гэрлийн тохиргоо стандартын бус байдгаас осол аваар гарах эрсдэл үүсч байгаа тул Автотээврийн үндэсний төвөөс баруун хүрдтэй автомашинуудын гэрлийн тохиргоог зөв тусгалтай болгон өөрчлөх судалгаа хийгдэж байгаа аж.
Шуурхай хурлын үеэр хөгжлийн бэрхшээлтэй иргэдийн эрхийг хангах хүрээнд тэдэнд зориулсан нийтийн тээвэр, зам, орон сууц, бусад барилга, байгууламжийн хүртээмжийг нэмэгдүүлэх, иргэдэд тулгамдаж байгаа асуудлыг нь шийдвэрлэх, амьдрах орчин, нөхцөлийг нь сайжруулах, нийгэм-сэтгэл зүйн хэрэгцээтэй үйлчилгээ авах, нийгмийн харилцаанд бүрэн тэгш оролцох боломжийг нь хангахад анхаарч ажиллахыг салбарын сайд харьяа байгууллагуудад үүрэг болгов.
Түүнчлэн байгаль орчинд хор хөнөөлтэй зам, тээврийн хог хаягдалд байгаль орчинд сөрөг нөлөө үзүүлэлгүй дахин боловсруулалт хийж буй хувийн хэвшил, аж ахуй нэгж, энэ чиглэлээр үйл ажиллагаа явуулж байгаа байгууллагуудыг бодлогоор дэмжих шаардлагатай гэдгийг салбарын сайд онцоллоо. Тиймээс ЗТХЯ, БОНХАЖЯ-наас хамтарсан тушаал гаргах ажлыг зохион байгуулахаар болов.
Мөн Хөвсгөл аймгийг байгалийн аялал жуулчлалын бүс болгох хүрээнд Хатгал тосгоноос нуурын баруун эрэг хүртэлх автозамын асуудлыг шийдэхэд холбогдох байгууллагуудтай хамтарч ажиллах үүргийг өглөө. Үүнтэй холбоотойгоор аялал жуулчлалын улирал эхэлж байгаа тул Хөвсгөл далайд аялж байгаа хөлөг онгоц, усан завиудад үзлэг, шалгалт хийж, зөвшөөрөл, гэрчилгээ олгодог болгох асуудлыг тус хуралдаанаар хэлэлцэв.
Та энэ мэдээнд ямар үнэлгээ өгөх вэ?
Репортлов
Шинэ мэдээ
-
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
6 сарын өмнө
