Эдийн засгийн байнгын хорооны гишүүд Санхүүгийн зохицуулах хорооны ажилтай танилцлаа
.jpg)
УИХ-ын Эдийн засгийн байнгын хорооны гишүүд Санхүүгийн зохицуулах хорооны ажилтай танилцлаа.
Байнгын хорооны дарга Д.Тэрбишдагва, гишүүн Б.Жавхлан, Б.Ундармаа, Л.Элдэв-Очир, С.Чинзориг нар холбогдох хууль тогтоомжийн хэрэгжилт, эдийн засгийг сэргээх хөтөлбөрт тусгагдсан зарим зорилт, арга хэмжээг хэрэгжүүлэх бэлтгэл ажлын явц байдалтай танилцахаар очсон юм.
Эдийн засгийн байнгын хорооны дарга Д.Тэрбишдагва нээж үг хэлсэн. Тэрбээр “Та бүхний хийж буй ажлын талаар тодорхой мэдээлэл авах зорилготой. Ажилтай танилцаж зөв ойлголттой болж, харилцан бие биенээ дэмжиж ажиллах, болохгүй байгаа асуудлыг засч залруулах нь бидний зорилго” гэв.
Хорооны дарга С.Даваасүрэн Санхүүгийн зохицуулах хороо 2006 онд байгуулагдсанаас хойш анх удаагаа УИХ-ын гишүүд ирж байгаа гэдгийг тэмдэглээд оролцож буй ажилтнуудаа танилцуулсан.
Дараа нь байгууллагынхаа дунд болон урт хугацаанд баримтлах бодлого, ББСБ /банк бус санхүүгийн байгууллага/ болон хадгаламж зээлийн хоршоо, даатгалын зах зээл, хөрөнгийн зах зээлд цаашид баримтлах бодлогын чиглэл, баримтлах бодлогын чиглэлийн дагуу хийгдэх ажлын төлөвлөгөөгөө танилцууллаа.
Танилцуулгадаа “2015 оны эцэст ББСБ-ын хувь нийлүүлсэн хөрөнгийг нэмэгдүүлэхээр шийдвэрлэсэн. Энэ тогтоолоор зээлийн үйлчилгээ эрхэлж байгаа ББСБ-уудын хувь нийлүүлсэн хөрөнгийн доод хэмжээг 800 сая төгрөг болгож, хоёр дахин өсгөхөөр тогтоосон. Өнөөдрийн байдлаар улсын хэмжээнд үйл ажиллагаа явуулж байгаа 527 ББСБ-ын 500 нь тогтоолын биелэлтийг хангасан байна. 2016 онд компаниудыг улам чадавхжуулах, эрсдэл даах чадварыг нь нэмэгдүүлэх, хэрэглэгчид, үйлчлүүлэгчдийн эрх ашгийг хамгаалах чиглэлүүдээр бодлогын шийдвэрүүд гарган, зохицуулалтыг уян хатан, урт хугацаанд тогтвортой байлгах зарчмыг баримталж, энэ бодлогынхоо хүрээнд эхний шийдвэрээ гаргаж, нийслэлд шинээр байгуулагдах ББСБ-ын хувь нийлүүлсэн хөрөнгийн доод хэмжээг 2.5 тэрбум төгрөг болгосон. Бидний тооцоогоор жилд 20 ББСБ шинээр нэмэгдэхээр байгаа. Хувь нийлүүлсэн хөрөнгийн доод хэмжээг 2.5 тэрбум төгрөг болгох шийдвэрийг бид өнгөрсөн оны 10 дугаар сарын дундуур гаргаад, 12 дугаар сард Хорооны ээлжит хуралдааныг зохион байгуулахад гурван ББСБ шинээр байгуулахаар асуудал орж ирснийг шийдвэрлэсэн. Өөрөөр хэлбэл хоёр сард гурван ББСБ шинээр байгуулагдсан нь урьдчилан тооцсон үр дүнтэй тохирч байна.
2017-2020 онд хувь нийлүүлсэн хөрөнгийн хэмжээг нэмэгдүүлэх бодлогоо жижиг дунд үйлдвэрийн, орон сууцны зэрэг хөнгөлөлттэй зээлийн хөтөлбөрүүдтэй хослуулан хэрэгжүүлснээр ББСБ-уудын нийт хөрөнгийн хэмжээ одоо байгаагаасаа 3.3 дахин нэмэгдэж, зээлийн үйлчилгээний жигнэсэн дундаж хүү 2.1 хувь болж хоёр дахин буурах тооцоо гаргасан. Энэ бол зах зээлийн эрэлт, нийлүүлэлт дээр суурилсан судалгаа, тооцоолол” хэмээн дурьдлаа.
Мөн тус хорооны ББСБ-ын газрын дарга С.Баянцогт, Хяналт шалгалтын газрын дарга Б.Ариунаа, Ажлын албаны дарга Т.Жамбаажамц нар тус тусын чиглэлээр ажлаа танилцууллаа.
2016 оны хоёрдугаар улирлын байдлаар Үнэт цаасны төвлөрсөн хадгаламжийн төвд 800.0 мянган гаруй иргэн, аж ахуйн нэгжийн үнэт цаасны данс бүртгэлтэй байгаа боловч тэдгээрийн ердөө 10.0 орчим хувь нь л идэвхтэй арилжаанд оролцдог байна. Мөн манай улсын иргэдийн 90 гаруй хувь нь хөрөнгийн биржийн арилжаанд нэг ч удаа оролцож байгаагүй зэрэг өргөн хүрээтэй судалгаа хийснээ холбогдох албан тушаалтан танилцуулсан.
Үүний дараа УИХ-ын гишүүн Л.Элдэв-Очир, С.Чинзориг, Д.Тэрбишдагва Б.Ундармаа, Б.Жавхлан нар үг хэлж, байр сууриа илэрхийлэн, асуулт асууж, санал солилцов.
Гишүүд хэлсэн үгэндээ сайн танилцуулга бэлтгэж, мэдээлэл өгсөнд талархал илэрхийлсэн.
Байнгын хорооны дарга Д.Тэрбишдагва Санхүүгийн зохицуулах хорооны залуучуудын ажлыг үнэлж, дэмжиж байгаа. Одоо зөв тийшээ эргэх болов уу гэж харж байна хэмээсэн бол УИХ-ын гишүүн С.Чинзориг “Өнгөрсөн хугацаанд Санхүүгийн зохицуулах хороог ББСБ, Хадгаламж зээлийн хоршоотой хөөцөлддөг байгууллага гэж хардаг байсан. Үнэт заас, хөрөнгө, даатгалын зах зээлийн талаар ард түмэнд мэдээлэл сайн хүргэж, зөв ойлголттой болгох, энэ зах зээлд олон нийтийг оруулах чиглэлд түлхүү явмаар байна. Хяналт шалгалтын ажлаа эрчимжүүлээрэй. Эдийн засаг хямралтай байгааг далимдуулж өмнө нь хадгаламж зээлийн хоршоод иргэдийн хөрөнгийг үгүй хийсэн шиг явдал гарахаас сэргийлж ажиллаарай. ББСБ-ын зээлийн хүүг бууруулах зорилт тавьсан гэж ярьж байна. Бууруулах боломжтой. Үүнийгээ ажил болгоорой” хэмээв.
УИХ-ын гишүүн Б.Жавхлан ББСБ-ын зээлийн хүү бууруулах маш хүнд, том зорилго тавьсныг дэмжээд, үүнийгээ биелүүлэх, мөн хөрөнгийн зах зээлийг хөгжүүлэхийг захилаа.
УИХ-ын гишүүн Б.Ундармаа “Зорилгоо тодорхойлоод зоригтой ажиллаж байгаа юм байна. ББСБ-ын зээлийн хүүг 2,1 болгоно гэдэг биелэхэд маш хүнд ч үүндээ хүрч ажиллаж чадвал үнэхээр сайн” гэлээ.
Төгсгөлд нь, Байнгын хорооны дарга Д.Тэрбишдагва “Та бүхэн хийж буй, хийх ажилдаа их итгэлтэй байгаа юм байна. Тавьж буй зорилгыг энэ байгаагаар нь дэмжинэ. Эдийн засгийн байнгын хороо чадахаараа дэмжиж ажиллана” гэсэн юм. Мөн Санхүүгийн зохицуулах хорооны дарга С.Даваасүрэн ажлыг нь дэмжиж байгаад гишүүдэд талархал илэрхийллээ.
Эх сурвалж : УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.Та энэ мэдээнд ямар үнэлгээ өгөх вэ?
Репортлов
Шинэ мэдээ
-
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
2 долоо хонгийн өмнө -
6 сарын өмнө
